H

اولاً, كنت كاره الانقطاع عن مدونتي هالاسابيع لاني متعود اضيف لها شبه يومياً بس حاولت اعوض بالمشاركات في المنتدى بما انه من زمان مشاركاتي محدودة لاقسام معينة فقط. ثانياً, من بعد هالانقطاع حبيت احط شي special وايد بالنسبالي, و هو بوستر لمادونا من اروع جولة The Girlie Show - و هالبوستر متعلق فيها بشكل خيالي مش بس لأنها نادرة لكن لأن في قصة وراها.


لهاللحظة اذكر اول ما شفتها في مركز برجمان بدبي و انا ياهل, بس ايامها طبعاً لو اتلفظ بكلمة "مادونا" بنربط في بيك أب و بيطرشوني لأقرب اصلاحية - فما قدرت اتجرأ اشتريها بس تمت عالقة في راسي و كنت دايماً اقول يا ريتني قدرت ارجع و اخذها بالدس و بالفعل رجعت بعد اقل من سنة و لقيتها مخلصة.

قبل ٩ سنوات تقريباً اتصل بي اعز و اقرب اصدقائي من محل بالعين و قالي لقاها, و هو طبعاً عرفها من كثر ما كنت اكلمه عنها و كنت بموت من الفرحة لان انصدمت انها موجودة في العين بما انه مالها أي اثر بالانترنت و كل معجبين مادونا اللي سألتهم ما يعرفونها! قام سألهم عن السعر عشان يشتريها و قالوا له مش للبيع, حاول بشتى الطرق بس ما في فايدة - انحبطت بس تفاجأت فيه بعد كم يوم جايبلي اياها, سألته كيف خلوك تشتريها؟! قالي ما خلوني, بس سرقتها!

الحين كل ما اشوفها اتذكر هالسالفة و بالطبع اتذكر اعز اصدقائي (صار له سنوات يدرس في امريكا) و اتذكر اول يوم شفتها في برجمان و كيف كانت الشغالة تقولي your mama will KILL you - كل هالاشياء تخليها لا تقدر بثمن و اهم بوستر بالكولكشن اللي عندي.

اولاً اسف عالانقطاع لان صارت لي ظروف بس اليوم انصدمت لقيت هالرسمة مطرشها لي F A H D بملفي و طبعاً ما يصير ما احطها بالمدونة لانها تاخذ العقل و ميت عليها:

اخر يومين في شغلة لازم اخلصها مع شخص و امور كثيرة متوقفة عليه, و كل ما يغيب يتأخر بالساعات و احياناً لليوم الثاني و انا مستعجل ابغي اخلص بسرعة لأن الموضوع ضروري يخلص خلال هاليومين, اتصل و ما في جواب و اطرش مسجات و لا في فايدة - كل ساعة تمر احس كأنها يوم كامل لأني خايف من التأخير اللي بينقلب ضدي و هالشي مثل ما كلنا نعرف يوتر.

واجهته و حسيت انه في نوع من اللا مبالاة لأن رجع يتغيب, كيف الواحد يقدر يتصرف مع هالاشخاص؟ هالشغل بفلوس مش تطوعاً منه مثلاً و متفقين على جدول لكن ما في احترام للمواعيد و السبب الوحيد اللي مخلني مستحمله هو اني محتاج له.

الحفلة و الاغنية و العرض و المسرح كله على بعضه بالنسبالي perfection - من جولة United و الاغنية من البوم Exodus و هو اول البوم انجليزي لاوتادا.

اليوم وصلوني ثلاث مجلات لملكة البوب و كل مجلة أروع من الثانية, طبعاً اثنين منهم هم العدد الاخير من مجلة Interview اللي طالعة فيها مادونا بأجدد و أجمل صورها و المجلة الثانية هي Vogue اللي نزلت اثناء جولتها الاخيرة Sticky & Sweet و هالمجلة انتظرتها 3-4 شهور عشان توصلني لكن كانت تستاهل الانتظار لأن جد التصوير و المجلة ابداع و اتركم مع الصور: